ზაზა ბეჟაშვილი და ია ვახანია: "გამორიცხული არ არის, ერთმანეთი შეგვიყვარდეს"

მსახიობები ზაზა ბეჟაშვილი, ანუ ზუზუ და ია ვახანია ერთმანეთს ფილმ "ჩემი ცოლის დაქალის ქორწილის" გადასაღებ მოედანზე შეხვდნენ. მათმა ეკრანულმა წყვილმა მაყურებელს საკმაოდ თამამი ინტიმური სცენით დაამახსოვრა თავი. ამ პერსონაჟების ისტორია სერიალშიც გაგრძელდა, მერე კი მსახიობები რეალურ ცხოვრებაშიც დაახლოვდნენ.
ია თეატრალური უნივერსიტეტის სამსახიობო ფაკულტეტის მესამე კურსის სტუდენტია. ზუზუ სამომავლო გეგმებს არ ამხელს, მაგრამ დატვირთული სამუშაო რეჟიმი აქვს. თავისუფალ დროს ერთმანეთის მოკითხვა არ ავიწყდებათ და არ გამორიცხავენ, რომ მათი ურთიერთობა სხვა ფაზაშიც გადავიდეს.
– როგორ დაგამახსოვრდათ თქვენი პირველი შეხვედრა?
ია: ზუზუსთან ერთად მანამდე არ მიმუშავია. შორიდან კი ვიცნობდი. კინოგადაღებაზე პირველად მიმიწვიეს და ვღელავდი.
ზაზა: როგორც წესი, მსახიობს, რომელიც ჩემი პარტნიორი უნდა იყოს, ფილმის გადაღებამდე მაცნობენ. იას კი პირდაპირ გადასაღებ მოედანზე შევხვდი. მეუბნებოდნენ, არ იცი, რა კარგ გოგოსთან უნდა ითამაშოო. მართლებიც აღმოჩნდნენ.

– სერიალში თქვენი გმირების სასიყვარულო ურთიერთობა განვითარდება?

ია: წინასწარ არასდროს ვიცით, რა მოხდება.
ზაზა: საინტერესო ის არის, რომ ფილმში ჩვენი ურთიერთობა დაიწყო და დასრულდა, სერიალში კი – აღდგა.
– ეკრანულ წყვილს რეალურ ცხოვრებაშიც უყვარდებათ ხოლმე ერთმანეთი და ამის არაერთი მაგალითი არსებობს. ზაზა, არსებობს ალბათობა, რომ ასეთი კარგი გოგოთი მოიხიბლოთ?
ზაზა: ცხოვრებაში ყველაფერი შეიძლება მოხდეს. ჯერჯერობით ჩვენ შორის შესაძლებელია კარგი მეგობრობა ჩამოყალიბდეს.
ია: ორივეს ძალიან დატვირთული რეჟიმი გვაქვს, მაგრამ, თუ თავისუფალ დროს ვპოულობთ, ვურეკავთ და ერთმანეთის ამბებს ვკითხულობთ.
– ზაზა, თქვენი ეკრანული გმირი ნიკა, მიუხედავად თავისი ქარაფშუტობისა, საკმაოდ პოპულარულია, ალბათ იმიტომ, რომ ტიპური სახეა, თითქმის ყველას გვყავს ცხოვრებაში ასეთი ნაცნობი, ახლობელი ან თანამშრომელი. პირადად თქვენ რას ფიქრობთ, ამ პერსონაჟზე, როგორ დაახასიათებდით მას?
ზაზა: ჩემი პერსონაჟი დეგენერატი და არაადეკვატურია. არავინ იცის, ეს გმირი როგორ განვითარდება. შეიძლება დადებითი გმირი გახდეს და ყველა გააოცოს ან პირიქით – უარყოფითი. ისე, ჩემს გმირს ვამართლებ, მაგარი ტიპია.
– თქვენი თვისებებიც ხომ არ აღმოაჩინეთ მასში?
ზაზა: არანაირი საერთო არ გვაქვს. უბრალოდ ჩემ მიერ შექმნლ გმირებს ყოველთვის ვამართლებ. ვფიქრობ, რომ არ არსებობს, ადამიანის რომელიმე საქციელს გამართლება არ მოეძებნოს.

– თქვენს გმირს ყოფილი ცოლის დასთან აქვს ფლირტი. ესეც გამართლებულია?
ზაზა: სხვათა შორის, აი, ამ ფაქტსაც არ გამოუწვევია უარყოფითი დამოკიდებულება მაყურებლის მხრიდან. არადა, წესით, საქართველო ფეხზე უნდა ამდგარიყო. უფრო სწორი იქნება, თუ ვიტყვი, რომ ცხოვრებაში არაფერი მაკვირვებს.
ია: ვფიქრობ, უარყოფითი რეაქცია იმიტომ არ მოჰყოლია ამ ფაქტს, რომ ჩემი გმირი ეროვნებით რუსია. ქართული მენტალიტეტის თანახმად კი, აბა, რა, რუს გოგოსთან ფლირტი უნდა დაწყებულიყო.
– ია, რეალურ ცხოვრებაში ნიკასნაირი მამაკაცი მოგხიბლავდათ?
ია: რატომაც არა? ვფიქრობ, რომ სიყვარულს არც ასაკი და არც არანაირი სტერეოტიპი არ გააჩნია.
ზაზა: იას ვეთანხმები. შეიძლება ისეთი იდიოტი შეგიყვარდეს, ვერასდროს რომ წარმოიდგენდი და სწორედ იმიტომ, რომ იმ მომენტში ეს იდიოტიზმი გაკლდა.
– ია, თქვენ რა პარალელებს გაავლებდით საკუთარ თავსა და თქვენს პერსონაჟს შორის?
ია: მასთან არანაირი საერთო არ მაქვს. ერთადერთი, როგორც სერიალში, ცხოვრებაშიც ჩემი დები, მამის მხრიდან, საკმაოდ დიდ ასაკში გავიცანი. ისინი ამჟამად ლონდონსა და ნიუ იორკში ცხოვრობენ.
– სცენარისტმა იცოდა თქვენი ამბის შესახებ?
ია: არა და სცენარი რომ წავიკითხე, გავგიჟდი! სცენაზე კარგად გამოვიყენე ცხოვრებაში მიღებული ემოცია.
– უყურებენ თქვენი დები სერიალს?
ია: ის ეპიზოდი ნახეს, ჩემს დებს რომ ვეცნობი სერიალში და ძალიან ემოციურად აღიქვეს. ერთმანეთს მუდმივად ვეკონტაქტებით ინტერნეტის საშუალებით.

ზაზა: ჩემთან ერთად ია რომ გამოჩნდა სერიალში, მირეკავდნენ და მეუბნებოდნენ, ძალიან კარგი გოგოაო. ეს იას გადავეცი. მეც მომწონს, როცა ჩემზე კარგს ამბობენ. იამ ამ კომპლიმენტებზე მითხრა, რა მოსწონთ ჩემს თამაშში, არაფერს ვაკეთებო. ჰოდა, ეგ არის მაგარი, არაფერს რომ აკეთებ, ანუ ბუნებრივად თამაშობ–მეთქი.
– ზაზა, კრიტიკის მიღება ხომ არ გიჭირთ?
ზაზა: პირდაპირ ვიტყვი, არ მიყვარს კრიტიკა! ეს იმიტომ, რომ ჩვენთან კრიტიკა არ არსებობს. თან არ ვარ ისეთი ადამიანი, ვისაც შენიშვნას მისცემ და მეორე დღეს კარგად მოიქცევა. შეცდომას, პირველ რიგში, მე ვხვდები. როცა სწორად და დადებითად აღნიშნავენ იმას, რასაც ვაკეთებ, უფრო კარგად ვმუშაობ.
– ია, ზაზასთან ერთად საკმაოდ თამამი როლი შეასრულეთ ფილმში. ქართველი მსახიობები ამგვარ სცენებში მონაწილეობას ნაკლებად თანხმდებიან. თქვენ როგორ დაგითანხმეს?

ია: უნდა ვთქვათ, რომ არამარტო საქართველოშია ასე, სხვაგანაც ძნელად თანხმდებიან. ეკა მჟავანაძემ დამირეკა და მითხრა, თუ როლზე დავთანმხდებოდი, ინტიმური სცენის თამაში მომიწევდა. თეატრალურში რომ ვაბარებდი, ვიცოდი, რომ ოდესმე ამგვარი როლის მორგებაც მომიწევდა. ზუზუ რომ გავიცანი, ამ როლის თამაში უფრო გამიადვილდა.
ზაზა: ამგვარი სცენის გადაღება დიდ ესთეტიკას მოითხოვს. ვფიქრობ, ნორმალურად ვითამაშეთ, სცენა კარგად იყო გადაღებული და ამიტომაც მაყურებლისგან არანაირი უარყოფითი გამოხმაურება არ მოჰყოლია. ეს კი იას დამსახურებაა. სანამ გადაღებებს დავიწყებდით, ძალიან ნერვიულობდა, ცოტა მეჩხუბა კიდეც რაღაცაზე, მაგრამ გადაღების დაწყებიდან კარგად მიჰყვა როლს.
ია: სხვისი აზრით ყოველთვის ვინტერესდები, მაგრამ არც მე გამიგია, რომ ჩვენს ამ როლებს უარყოფითი რეაქცია მოჰყოლოდა.
– არც თქვენი ოჯახის წევრებისგან?
ია: მათ იციან, რა პროფესია მაქვს და სწორად იგებენ, რომ ეს ჩემი საქმეა. ამ როლმა უარყოფითი ის მომიტანა, რომ ფილმის გამოსვლიდან მალევე სხვებმა დამირეკეს და კვლავ თამამი როლის შესასრულებლად მიმიწვიეს. ყველას უარი ვუთხარი.
ზაზა: კარგია, უარი რომ თქვა, რადგან შტამპი არ უნდა დაედოს, თითქოს მხოლოდ ამგვარი როლების შესრულება შეუძლია. ახლა იას გმირი სერიალში უკვე სხვა სახითაც ჩანს და თანდათან ვითარდება.
– ია, სერიალში თქვენს გმირს საშიში თაყვანისმცემელი ჰყავს. რეალურ ცხოვრებაში გქონიათ ურთიერთობა ამგვარ მამაკაცთან?
ია: ამგვარ შეუგნებელ ადამიანთან ურთიერთობა ნამდვილად არ მქონია.
– სერიალის მიმდინარეობის მიხედვით ჩანს, რომ ზაზას გმირი შეიძლება ამ საშიშმა თაყვანისმცემელმა სცემოს კიდეც.
ზაზა: გამორიცხული არ არის, ჩემმა გმირმა თავი ისე დაიძვრინოს, არაფერი მოუვიდეს, თუნდაც დაიმალოს ან იმ ტიპთან დაძმაკაცდეს. იმდენად არაადეკვატური პერსონაჟია, რომ არაფერია გამორიცხული.
– ზაზა, რეალურ ცხოვრებაში გოგოს გამო გიჩხუბიათ?
ზაზა: მე არ მიჩხუბია, მაგრამ ამის გამო ჩემთან ჰქონიათ კონფლიქტი. მახსოვს, ერთხელ სახლში მომივარდა ტიპი ძმაკაცთან ერთად. დღემდე არ ვიცი, რა უნდოდა. ის გოგო ჰყვარებია, ვისთან ერთადაც დამინახა. წესით, უნდა შემშინებოდა, რადგან ის დრო იდგა, თითქმის ყველა იარაღით რომ დადიოდა, მაგრამ მე გამეცინა. ამ ყველაფრის დასასრული ის იყო, რომ იმის ძმაკაცი დამიძმაკაცდა და არც იმ გოგოსთვის დამინებებია თავი.
– მაყურებელი ეკრანულ გმირს თავად მსახიობთან ხშირად აიგივებს, მით უმეტეს, ამ სერიალის მსახიობებისადმი ასეთი დამოკიდებლება აშკარაა. ეს თქვენც გიგრძვნიათ, მაგალითად, თქვენი პერსონაჟების სახელით მოუმართავთ?
ზაზა: არასდროს. უბრალოდ, ხანდახან მგონია, რომ ამ სერიალში თამაშის გარდა არაფერი გამიკეთებია, რადგან ყველა მის გარშემო ტრიალებს. მაყურებლისგან ჩემ მიმართ დიდი პოზიტივი მოდის.
ია: არც მე მიგრძვნია, რომ მაყურებელი გმირთან მაიგივებდეს. მეგობრები ფილმის თამამი სცენის გამო მეხუმრებიან, მაგრამ სხვებისგან მხოლოდ დადებით ემოციებს ვიღებ.
– ზაზა, როგორ შეეგუეთ ცვლილებას, როცა კატოს როლის შემსრულებელი ნინო გაჩეჩილაძე სერიალიდან წავიდა და მის მაგივრად ლელა მებურიშვილი მოვიდა?
ზუზუ: ლელა მებურიშვილს ვიცნობდი და ყოველთვის პატივს ვცემდი. რაც შეეხება გაჩკას (ნინო გაჩეჩილაძეს), ჩემი მეგობარია. რა თქმა უნდა, დასანანი იყო ეს ცვლილება ჩემთვის, მაგრამ ეს იმას არ ნიშნავს, რომ ორ მსახიობს ერთმანეთს ვადარებ. ლელას ძალიან კარგი აურა აქვს.
– დაბოლოს, თქვენი გეგმები გაგვიმხილეთ, უახლოეს მომავალში რას აპირებთ ან თქვენს პირადში რა ხდება?
ია: კიდევ ერთი სერიალიდან დამირეკეს და მონაწილეობაზე უარი ვთქვი, იმდენად დაკავებული ვარ სწავლით და ამ სერიალის გადაღებებით. პირადი ცხოვრებისთვისაც კი დრო არ მრჩება.
ზაზა: მაქვს სამომავლო გეგმები, რომელთა შესახებაც არ მსურს საუბარი, რადგან არ მიყვარს, წინასწარ რომ ვამბობ რამეს. რაც შეეხება ჩემს პირად ცხოვრებას, არასდროს ვარ გრძნობის გარეშე, ყოველთვის არსებობს რაიმე ურთიერთობა. არ დავკონკრეტდები, უბრალოდ ვიტყვი, რომ საინტერესო ცხოვრება მაქვს.
მანანა ნოდია